this page in English
Vita Circuli Latini
Commorationes Vasintonienses
Regionis nostrae Latine loquentes uno quoque anno scholari quater quinquiesve, ab autumno usque in Maium, Latine sermocinandi causa congregari solemus. Non solum circum mensam prandentes et caffeam sorbillantes et cenantes sed etiam diversis in locis varia agentes Latine colloquimur; nam, aeque atque in Conventiculis Vasintoniensibus, pro comperto habemus plerosque homines melius citius profundius linguam quamlibet ediscere si modo cinaesthetico, sive varia agentes, se in lingua nova exercent. Itaque in Commorationibus nostris iam expositiones in museis inspeximus, hortos zoologicos tabernasque ac fundum quendam invisimus necnon et pulchras ambulationes in hortis publicis suscepimus. In proximum annum scholarem talia et multa alia in animo habemus, et omnes Commorationis tempore in Vasintonia civitate se versaturos exspectantes ex corde invitamus ut his optimis iucundissimisque occasionibus Latine loquendi utantur!
Diebus infra indicatis habebuntur horno (MMIX-MMX) Commorationes Vasintonienses, quarum ante quamque praeconium electronicum late divulgabitur. Alias regiones aliasve terras inhabitantes semper optatissimi nos invisent, Commorationibus intererunt, necnon invitantur ut nos in antecessum electronice adeant ut de vecturis et hospitio ceterisque singulis consilia capiamus. Californiensibus, quorum nonnulli se iam ad nos contulerunt, praesertim facile est nec valde pretiosum "finem hebdomadis" nobiscum Latine conversari.
Anni Scholaris MMIX-MMX Commorationes Vasintonienses:
-
14 die mensis Novembris anni MMIX
-
20 die mensis Februarii anni MMX
-
10 die mensis Aprilis anni MMX
-
22 die mensis Maii anni MMX
Tabularium Recensionum Commorationum Aliquot Praeteritarum
11 die mensis Octobris anni MMIII:
Hac in Commoratione pulcherrima artificia vitrea duabus in pinacothecis mirati sumus, in popina peregrinaria prandentes pulchrum Sinum Elliott, quamvis aliquanto obnubilatum, prospeximus, assidue Latine garientes tabernas pervarias perscrutati sumus, in optimo caffeo nomine "Torrefactio Italica" nos refecimus, aliquot ex nostro numero et una Italice cenavimus. Horas octo fere et dimidiam Latine conviximus. Nonnullis cerebrum defatigatum est. Fatigatio tamen amoenissima!
8 die mensis Novembris anni MMIII:
In popinam Graecam "Continentalem" convenimus, ubi anno priori iam pranderamus. Post prandium Graecum festive Latineque habitum in Museum Burke, museum anthropologicum et palaeontologicum, prima fere hora transiimus in quo multa variaque exposita Latine descripsimus: plantarum bestiarumque fossilia; dinosaurorum, mastodontis, bradypodis gigantis aliorumque ossa mira arte palaeontologica reconcinnata; opificia artificiaque indigena e regionibus Pacifica et Americana boreoccidentali collecta. Post museum inspectum cum Latine loquentibus serius advenientibus in musei thermopolio congregati sumus, diu de multis gariimus, aliquot photographemata fecimus. Postea duas tabernas librorum tritorum inspeximus, quorum in altero librorum Latinorum Graecorumque thesaurum laeti invenientes avide exhausimus. Deinde in Cedrorum Popina cenam Indicam sapidissimam sumsimus. Post cenam tres ex nostro numero, Maria Ioanna et Adamus et Stephanus, in Odeum McCaw, odeum melodrammaticum ballematicumque nuper architectonice penitus ac pulcherrime redintegratum, semper Latine colloquentes iimus spectatum magnificum munus ballematicum, cui titulus "Ballema Nunc!" ab optimo grege praebitum cui nomen est Grex Ballematicus Pacificus Boreoccidentalis ("Pacific Northwest Ballet") quique inter totius mundi decem peritissimos plerumque numeratur.
24 die mensis Ianuarii MMIV:
Hoc die frigidiore quidem sed luce maritima coloribusque urbanis splendenti in popina quadam Italica, "Perche no?" (sive "Quidni?") nomine, sat bene prandimus, quamquam possestricem, feminam admodum garrulam, responsis magis magisque abruptis a mensa nostra tandem abigere necesse fuit ut inter nos Latine sermocinari possemus. Post discopolium nomine "Turris" invisum aliquotque discos compactos phonocapsulasque raptim emptas, in Centrum Artium Popularium Boreoccidentalium iimus fictilia versicoloria aliaque artificia varia spectatum. Deinde Centrum Pacificum Scientiarum Naturalium invasimus. Hoc museum ex multis aedificiis albidis constat inter quae sunt positae piscinae amplae a bestiis maritimis dinosaurisque artificiosis inhabitatae. Desuper lucent alti quadrupedes arcus nivei gracilesque, pulcherrime supra diatreti ut caeli caeruleum horum albo laete colludat. Ex intus visis mentio saltem facienda est (i) de dinosaurorum effigiebus maximis coloratis electroniceque motis; (ii) de aedibus topiariis calefactis quas incolunt huc illuc coloribus gloriantes volubiliterque volitantes papiliones innumeri; (iii) de talpirattis nudis (Linnaeano nomine "Heterocephalus glaber"), rodentibus scilicet parvis rattiformibus sed omnino glabris rosaceoque colore quorum capita natesque simillima oculique nigriculi exiguissimi. Quae rodentia, quamvis mammifera, quodammodo insectorum more vivunt, reginam eligentes cuius solius est officium toti talpirattorum populo prolis parendae. Cum sit mortua regina prior, talpirattis Seattlensibus nulla est in praesenti regina. Talia post miracula inspecta in thermopolium nomine "Olla Superior" transiimus ut nos et potionibus caffeariis et circellis frictis exquisitis reficeremus. Postea Asiatice et laute cenavimus. Tandem inter nos valere iussimus, venturam Commorationem, quae 21 die mensis Februarii habebitur, celebrare iam gestientes.
21 die mensis Februarii anni MMIV:
In thermopolio nomine "Torrefazzione Italia" hospitem Michiganensem, Aloisam Soter, profestricem adiunctam apud Vniversitatem Michiganiensem, nonnullis ex nobis iam notam, gratissime accepimus. Ibidem atque in collyrina quadam Italica postea prandentes diu de linguae Latinae doctrina methodisque et libris institutoriis sermocinati sumus. De ventura Commoratione, quam tertio d. m. Aprilis apud conventum philologorum classicorum habituri sumus, consilia aliquot fecimus. Postea urbis partem antiquam perlustravimus, aedificia vetusta inspeximus quorum in plerisque quondam, ut videtur, lupanaria condita sunt. Proh dolor in Turre Smith positum "Cubiculum Sinense," quod alioquin publico patet, illo die non licuit intrare -- quod autem sine dubio aliquando videbimus. Quamquam Seattli bona caffea expressa scatet, numquam meliorem sumpsimus quam eo die in thermopolio illius bibliopolii cui nomen est "Elliott Bay Bookstore" (sive Bibliopolium Sinus Elliott). Magni momenti repertum! Cenavimus postea Sinensiter tantum tres homines restantes (Adamus, Iunipera, Stephanus) mentes vocabulis cibariis exercitantes.
3 die mensis Aprilis anni MMIV:
Variis de causis, societatis philologorum classicorum, nomine "CAPN," non multi, proh dolor, adesse potuerunt conventui. Soli participaverunt Iunipera et Stephanus. Iucunda tamen utilisque fuit occasio philologos de linguae Latinae perenni usu certiores faciendi. Tot homines in Vasintonia et Latine loqui et discipulos suos linguae nostrae usum vel aliquatenus activum, quem dicimus, docere prorsus nesciverant complures. Stephanus acroasin brevem habuit de Latine loquentium rebus nuper gestis deque consiliis nostris ac doctrina nostra. Ad sententiam nostram deductae sunt ilico tres philologae, quarum omnes aut horno aut venturo anno conventiculum Latinum aliquod participare in animo nunc habent. Complures philologi rem nostram probaverunt; palam impugnavit nemo. Quae cum ita sint, adhuc operae pretium videtur nobis talibus interesse conventibus, quo saepius colloquia Latina audiant philologi inque sermones serendos alliciantur ipsi. Anno venturo Nicopolim Columbianam Britannicam congredientur.
6 die mensis Novembris anni MMIV:
Vndecima fere hora mature advenientes in illo thermopolio "Tulliano" sunt congregati quod in Gradibus Portoriis prope Museum Artium Seattlense situm est. Deinde in popina Mexicana proxime sita, "Taquería Guayamas" nomine, novos sodales salutantes cognoscentesque ac de multis variisque rebus sermocinantes Mexicane prandimus. Post prandium in Museo Artium Seattlensi speciosissimam expositionem artium Hispanicarum inspeximus in qua non solum Hispanica sed etiam aliarum gentium artificia pro exemplis historiae aevi explorationis Hispanicae praebita sunt. Vidimus pulcherrima anthropographemata, splendida arma humana et equina, tapeta, scripta antiqua non solum Hispanica sed etiam Latina. Fuit nobis fortuito post museum inspectum occasio nos reclamationi ambulatoriae contra Bellum Mesopotamicum iungendi. Pacem poposcimus, sententias cantitantes bellum reclamitavimus! Deinde novam bibliothecam municipalem Seattlensem scrutati sumus, cuius modus architectonicus modernissimus audacissimusque aliis nostrum placuit, aliis non valde placuit. Postea, inspecta breve ecclesia quadam antiqua modo Panthei exstructa, nos in thermopolio nobis acceptissimo refocilavimus; deinde in popina Sinensi in Omnium Gentium Regione sat laute cenaverunt nostri numeri non omnes sed satis multi.
22 die mensis Ianuarii anni MMV:
Vndecima hora matutina in illo thermopolio Starbuckiano congregati sumus quod in Centri Seattlensis Aedibus Mediis situm est. Paulo post quisque ex Aedium Mediarum popina sibi acceptissima, e multis quae ibi sunt, prandium emptum auferens ad mensam communem una cum ceteris Latine loquentibus sumpsit. Post prandium Museum Scientiae Ficticiae invisimus. Hoc in museo satis amplo sunt expositiones permultae de scientiae ficticiae litteris ac spectaculis cinematographicis et televisificis. Honorantur ibi scientiae ficticiae scriptores noti et maioris momenti. Multa de hoc litterarum genere ibi didicimus. Exhibentur ibi etiam librorum commentariorumque involucra phantastice picta necnon et pellicularum praeconia parietalia et omnia genera vestium et "memorabilium" quae quondam in huius generis pelliculis spectaculisque televisificis adhibita sunt. Inest, exempli gratia, et ipsa "Extraterrestris Regina" contra quam pugnavit Sigourney illa Weaver in pellicula cui titulus "Extraterrestres." Videri possunt etiam Navarchi Kirk et Primi Praefecti Spock tunicae primae. Fuit nobis non solum de scientiae ficticiae libris et pelliculis sed etiam de omni philosophia naturali et technologia colloquendi occasio. Post museum inspectum multi ex nostro numero spatiati sunt vel tabernas varias prope sitas inspexerunt. Nostrum quinque de vita nostra et cibis necnon et de allurgiis (sive “allergiis” ut minus recte vocantur) sermocinantes una cibos Thailandenses cenavimus.
19 die mensis Februarii anni MMV:
Hoc pulcherrimo die Saturni Erika Peck, dilecta sodalis nostra, urbis Seattli regionem Ballardiensem, patriam suam, nobis monstravit.
Vndecima hora in illud thermopolium Tullianum convenimus quod in in Viarum angulo Mercatus et Vicesimae Secundae iuxtaque Cinemateum Sinus Augusti ("Majestic Bay Theater") situm est. Cum omnes participaturi advenerunt, undecima fere hora cum dodrante, in popinam Indicam transiimus prandendi causa. Post prandium sapidum sermonesque de rebus valde variis sertos pernotas illas "Cataractas Chittenden" inspeximus, quae quidem non deiectus aquarum sunt sed potius saepta magna quorum ope navigia inter lacuum Vasintoniensium aquas dulces et Freti Pugetani aquam marinam transmittuntur. Cataractam unam navibus e Freto advenientibus impleri, portas externas claudi, aquam in fastigium altius tolli, naves tandem, apertis portis internis, in lacuum aquam dulcem emitti vidimus. Eodem loco sunt et "scalae piscariae," per quas salmones inter mare et aquas mediterraneas interversantur, et moles lacum artificiosum retinens meatuque effusorio instructa necnon et horti publici botanici in quibus plurimas conspeximus anseres anatesque et alias aves aquales.
Postquam Maria Ioanna, paulo aegrotans, nos reliquit, tabernam quandam librorum tritorum et discopolia duo invisimus et Ballardiae partem mediam, quae mihi Bostoniae partibus similior visa est, perlustravimus. Cibos exquisitos cenavimus omnes restantes in popina quadam Oaxacana (Mexicana) Erikae nostrae nota.
16 die Mensis Aprilis anni MMV:
Ad Commorationem incipiendam convenimus undecima hora in Thermopolium Sinus Elliott, quod in hypogeo Bibliopolii Sinus Elliott situm est. Hoc thermopolium -- ubi, praeter caffeam expressam exquisitam, apponitur sapidum opus pistorium glutine triticeo vacans -- nobis iam sat bene notum erat, nam ibi iam aliquoties congregati eramus. Post refocillationem sermonesque cum de variis rebus tum de venturo Conventiculo Rustico sertos plerique ipsum amplum bibliopolium, primo in tabulato situm, perlustraverunt, manentibus in thermopolio Stephano et Accio. Duodecima fere hora in popinam piscariam nomine "Ivar’s," in mole quadam portoria haud longe distanti posita, transiimus ubi Latine loquentes propspectuque maritimo perpulchro fruentes prandimus. Post prandium ambulationemque postprandialem iucundissima suscepimus duo. Scilicet et Aquarium Seattlense et proxime situm Museum Odysseïcum Maritimum invisimus. In Aquario sane plurima piscium et crustaceorum et molluscorum et mammalium aqualium exempla scrutati sumus. Ex omnibus maxime delectaverunt nos et octopodes ingentes et vividissimorum colorum pisculi tropici et lutrae tam amabiles lascivaeque ut Maria Ioanna se lutram fieri cupere asseveraverit. Proh dolor autem nullos vidimus spheniscos (sc. aves polares bicolores non volantes). In Museo Odysseïco Maritimo exhibebatur, inter alia multa, series quadraginta picturarum a pictrice d'Elaine A. Herard Johnson pictarum antiquos mythos maritimos describentium -- quae res plane historicos et philologos classicos delectavit. Accius (Watanabeus) noster in quadam exhibitione reciproca (sive "interactive") minuta, portum mercatorium exprimenti, grue minima usus est ut vasa oneraria a nave in molem exponeret. Ceteris tot Latine factis, ut videbatur, paulo fatigatis, Stephanus et Accius soli in popina Serica de consiliis futuris colloquentes cenaverunt.
19 die mensis Novembris anni MMV
Huius anni scholaris Commorationi primae interfuerunt homines tantum quattuor. Plerique enim qui antehac assiduissime constantissimeque participaverant alumni erant qui iam aliis in regionibus studiis postbaccalaureis incumbunt. Scilicet creandus est, ut ita dicam, Commorationum "nucleus" novus. Neque hoc difficile videtur, nam illo die adfuerunt duo homines novi, doctorandi apud Vniversitatem Vasintoniae studentes, qui, etsi antea rarissimo Latine locuti erant, ingentem tamen ob peritiam Commorationibus futuris magno emolumento et fulmento fore se demonstraverunt. Neque desunt alii qui futuro tempore se nostro numero addi cupere asseveraverint.
Post prandium Graecum Latine festiveque sumptum museum quoddam anthropologiae historiaeque naturali dicatum invisimus cui est nomen "The Burke Museum." Haec occasio aptissima fuit qua vocabula ad animalia (et huius temporis et iam pridem extincta) atque ad gemmas mineraliaque coloresque et formas necnon ad multas cultus civilis humani partes spectantia recognosceremus recenseremusque. Quam post exercitationem iucundam animosque excitantem in thermopolii horto potionibus nos refocillantes de futuris inceptis nostris deque novis participibus alliciendis otiosi collocuti sumus.
21 die mensis Ianuarii anni MMVI
Commorationum Seattlensium post initium firmum, etsi participum numero parcum, Novembri mense factum, altera praesentis anni scholaris congressio nostra, 21 d. m. Ian. habita, una fuit ex frequentioribus; nam interfuerunt in summa undecim, quorum plerique novi. Iam ut sessioni prolusoriae adessent, thermopolium angustius ita compleverunt mature advenientes ut sellae essent nobis undique prospiciendae. Advenarum quinque Iuniperae nostrae -- quae ipsa quoque aderat -- discipuli erant quos, quamvis tirones et interdum lingua haerentes, nihilominus nonnisi Latine loqui, vel loqui temptare, valde admirati sumus ceteri. Prandium deinde, sollemne Commorationis huius exordium, quadam sumpsimus in popina Mexicana tam quieta ut, praeter modos musicos Mexicanos suaviter perfluentes, quisque non modo cum sibi propinquis sed etiam cum toto grege sermones serere facile valeret. Post prandium, Museum Seattlense Artium Asiaticarum perlustravimus, nunc globatim, nunc omnes una tamquam in mystagogia musiva singula artificia tractantes, colores formas instrumenta argumenta alienos mores interpretantes, vocabula iusta memorantes, descriptionum in tabellis suppeditatarum frusta Latine vertentes. Relicto museo, animos corporaque recreavit “Hortorum Publicorum Voluntariorum” perlustratiuncula. Tunc, digressis plerisque, in theobromatopolio lautiore proximoque sito potiones bellariaque sumpserunt restantes quattuor: Angela, Brennus, Iunipera, Stephanus. Proxima de Commoratione, in 18 diem m. Feb. indictam, consilia aliquot sunt capta; aquarium publicum esse nobis invisendum decretum est. Brennus Stephanusque cibos postremo Thailandenses cenantes de litteris Latinis modernis deque perennem Latinitatem inuste absoneque spernentibus philologis collocuti sunt.
18 die mensis Februarii anni MMVI
Huic Commorationi Seattlensi undecim iterum interfuerunt participes, etsi non omnes eidem erant qui mense Ianuario adfuerant. Scilicet, ob scholarum superiorum vacationem itinerabant eo tempore nonnulli. Convenimus undecima hora in Thermopolium Sinus Elliott, quod situm est in Bibliopolii Sinus Elliott hypogeo. Hoc thermopolium -- ubi, praeter caffeam expressam exquisitam, apponitur sapidum opus pistorium glutine triticeo vacans -- nobis iam sat bene notum erat, nam ibi iam aliquoties congregati eramus. Ipsum amplum bibliopolium, in pediplanis situm, gratissime inspexerunt nonnulli e nostro numero. Inter alia, memoriae lusum illum ibi lusimus qui dicitur “Vasa mea colligo et impono…”
Duodecima fere hora quandam in popinam portoriam transiimus ut Latine usque loquentes pranderemus. Post prandium ambulationemque postprandialem Aquarium Seattlense invisimus. In Aquario plurima piscium et crustaceorum et molluscorum et mammalium aqualium exempla scrutati sumus. De quibus quo facilius colloqui possemus indices aliquot vocabulorum appositorum et Stephanus et Iunipera ceteris suppeditaverant. Societas aluminica Alcoa pro discipulis participibus aditiales tesseras emit.
Quibus confectis rebus, perrexerunt multi in crami gelidi popinam Italicam nomine “Gelatiamo” ubi, bellariis fruentes, variis de rebus sermones iucundos satis diu serimus et quisque illa vocabla memoravit quae illo die didicerat: velut “squalus,” “lutra/lutris,” “fratercula,” “lacustris” et ita porro. Postremo Stephanus et Brennus quadam in collyrina (vulgo “trattoria”) cenantes solitaque argumenta tractantes (velut Latinitatis perennis fata) commorationem usque ad finem adduxerunt.
8 die mensis Aprilis anni MMVI:
Octavo die mensis Aprilis hortos zoologicos perlustrare quamvis in animo habuissemus, ob caelum ventosum spurcumque ne circumambulare quidem Lacum Viridem valuimus, nedum bestias imbres fugientes foris inspicere, immo conspicere, temptaremus! Adeo anates complures, relictis lacus incommodis, sub arboribus propeque crepidinem ac pedes nostros herbae luxuriosius petivere refugium. Procellas igitur duobus e thermopoliis totque popinis aspicere decernentes Commorationem Seattlensem hanc in seminarium magis tralaticium solitumque convertimus. Nec vero gregis nostri cuiquam displicuit hoc, nam, etsi in Commorationibus varia variis locis agentes potius quam solito more scholari argumenta praestituta tractantes peritiam loquendi excolere solemus, haudquaquam ingratum est illi hoc interdum substituere -- immo vero in Conventiculis Vasintoniensibus nostris aestate habitis hi modi sat feliciter consociantur. Cunctas quaestiones propositas agitatasque exponere longum sit. Sufficit ut referantur pauca. Hortos zoologicos proxima in Commoratione esse invisendos visum est. Indicem insuper animalium omnibus prius suppeditatum paulo ampliandum novamque versionem omnibus praebendam. Disceptatum est etiam de pelliculis cinematographicis ac de modis quibus orbis terrarum gentes variae in eis repraesententur. Cum esset nemo nostrum dogmaticus fanaticusve, iucunde disceptatum est et de religionibus traditis. Hinduisticos philosophos, ut omnia numina prophetasque omnes probantes accipientesque multoque ampliorem in rationem metaphysicam sumentes theologiam omnium universissimam docere constitit. Divinitatis fontem exstare tandem unicum clare scientes eos innumeras tamen, immo, infinitas simul Divinitatis facies eo hominibus praeberi quia alii alia semper experiantur, sentiant, ob cultus civiles diversos cernere queant. Vedarum doctrinas metaphysicas permultas per scientiam physicam modernam, praesertim quantalem, esse nuper confirmatas: rerum aspectum exteriorem -- quod vidisse et Platonem -- vanam tantum esse speciem; cosmum holisticum, immo unam tantum rem omnino integram esse cuius quamque partem cuique alteri parti, ubicumque videatur versari, recta proximeque consociari; corporis mentisque insuper dualismum -- quem proh dolor defendebant Platonistae -- exstare demum nullum, ambo vanas esse species, realitatem aeque sub ambobus latere.
13 die mensis Maii anni MMVI:
Hoc “Die Latino,” priori prorsus dissimili, suscepto nostro blanditum est caelum. Diu primum in thermopolio sermocinati sumus multi. Mexicana deinde prandimus omnes. Post prandium, etsi nonnullos discedere oportuit, septem tamen e numero nostro hortos zoologicos Latine loquentes perlustraverunt. Quamquam nomina Linnaeana colloquiis Latinis saepe parum sunt idonea, interdum tamen sunt usui. Vel illum primatem qui vulgo “urang utan” fere appellatur scite denominavit Linnaeus “pongo,” quae indigenarum locutio videlicet rationi morphologicae Latinae perquam melius convenit. Altera ex parte, etsi illa denominatio nativa quae est “opossum” cum indole Latino non repugnat, locutio Linnaeana “didelphis, -is” (f.) eo anteponenda videtur quia, aliter quam linguis aliquot Europaeis utentes, hoc dicentes usui Americanoanglico non nimis indulgere videmur. Ceterum, multas invisimus bestias, e quibus in memoria nunc eminent praesertim gorillae pigrae, ursae horridae deambulantes, panthera onca se celans cuius videbatur tantum caput maculosum perspeciosum, sphenisci -- pro dolor!-- plane infelices ab ardea aliisque avibus volantibus invadentibus perterriti. In glaciei edibilis popinam illam c.n. “Gelatiamo” transierunt postea Stephanus et Brennus. Latine usque garrientes apud Furnaium Italice cenaverunt.
14 die mensis Octobris anni MMVI:
Vt fieri assolet, primam anni scholaris commorationem participaverunt pauci. Quinque tantum fuimus. Occasio fuit tamen optima non solum ut longum post intervallum linguas paulo solveremus sed etiam ut consilia caperemus de ventura commoratione in qua Maris Mortui Volumina in Physiologiae Centro Pacifico nunc exposita invisere in animo habemus. In symposio caffeario matutino insequentique prandio in Aedibus Mediis sumpto disceptatum est et de futura commoratione Voluminibusque illis et de amicis quos, etsi eo die absentes, futuris tamen commorationibus adfore nos docet harum rerum experientia. Post prandium inspectum est Museum Scientiae Ficticiae, qua occasione usus est Stephanus ut indicem suum vocabulorum ad scientiam ficticiam attinentium iterum ampliaret necnon et ut illius musei, quod saepius iam perlustraverat, socius tandem fieret. Cenaverunt Indica Stephanus et Brennus cum de Latinitate perenni tum de aliis linguis diu sermocinantes. Consitit linguam litteris pulchris aptissimam -- haud mirum -- esse Latinam!
18 die mensis Novembris anni MMVI:
Hoc die, omnino in Centro illo Seattlensi acto, participibus solitis constantibusque additi sunt “novis homines” tres, scilicet qui Commorationi Seattlensi nulli antea interfuerant. Post caffeam in Aedibus Mediis sorbillatam comissimumque colloquiorum exordium factum prandiumque tandem aliud ab alio ad mensam nostram circumdantibus ex popinis multigeneribus allatum sumptumque ad Centrum Scientale Pacificum transcendimus, ubi spectaculum cinematographicum “mysteria Aegypti antiquae” tractans primum spectavimus, deinde Maris Mortui Voluminum expositionem cum maximam tum maximi momenti perlustravimus. Qua in expositione ipsa volumina, ultima in parte demississima luce exhibita, haudquaquam unica fuerunt notatu digna; nam prioribus in aulis oculis auribusque praebita sunt innumera singula ad voluminum inventionem, historiam, conservationem, significationem religiosam attinentia. Immo maxime diversa explanata sunt argumenta velut computatio radiocarbonica, nummi antiqui Quumrani inventi, alphabeti Hebraei evolutio, Maris Mortui geologia, non solum voluminum dilaceratorum sed etiam fictilium confractorum restauratio, et ita porro.
20 die mensis Ianuarii anni MMVII:
Sapidissimos post lucuntes apud "Summam Ollam" sumptos caffeamque inter colloquia amoena sorbillatam in popinam quandam portoriam tandem transiimus ubi pisces aliosque fructos maritimos prandimus, omnia sane, ut solemus, Latine et nominantes et describentes. Peracto prandio, Hortos Sculpturarios Olympicos, qui illo ipso peraprico die primum aperti inauguratique erant, una cum vasta curiosorum multitudine perlustrantes inspeximus. Qui horti ut e regione portoria quondam ruinosa, foeda, unutili existerent exstruerenturque necnon plantis arboribus signis passim ornarentur, exsolvit - mirum dictu - Museum Artium Seattlense lxxxvi miliones thalerorum. Animadversum est hunc locum maxime idoneum fore ut Conventiculi Vasintoniensis venturi participes eum perlustrent, Iacobo nostro Dobreff sane de plantis arboribusque colloquia ducente. Commoratio haec conclusa est postquam in popina quadam nobis acceptissima glacie eduli Italica fructi sumus. Tractata sunt hoc perpulchro iucundissimoque die complura argumenta: Latinitatis perennis vices; ipsa signa statuaeque in hortis exposita; quomodo sint professores plures alliciendi; cuiusque vita, oblectamenta, aerumnae, cet.
14 die mensis Aprilis anni MMVII:
Hoc die decima hora cum dodrante in thermopolio nomine "Dilettante Mocha Café" congregati novos socios laeti excepimus duos: Andream, scholae superioris sophomorum, et Theudericum, programmatorem computatralem, linguae Theodiscae quondam professorem. Fervidos post sermones introductorios sertos potionesque sumptas aeque fervidas in illud forum merendarium ascendimus quod in Centri Lacus Occidentalis summo tabulato situm est. Ad prandium sumpsit quisque variis ex fori voratrinis cibum sibi praedilectum. Deinde ad illam expositionem transiimus cui est titulus “Corpora,” in qua scilicet verorum corporum humanorum partes doctrinae causa monstrantur. Alio in conclavi agebatur ibi de alio argumento. Vel in primo praebebantur visui corporis artus omnes; in secundo musculi, et singulatim et secundum symplegmata maiora; in alio repiratorium systema; in alio circulatorium; et ita porro. Talis quidem expositio ad Latine loquentium expeditionem appositissima visa est nobis non solum quia vocabula corporalia et medica pleraque Latina sunt sed etiam quia usque saltem in tempora non valde remota solebant Latine disceptare medicam docti. Hoc est, priscum quendam morem restaurare videbamur. Post expositionem inspectam popinam illam glaciei edulis Italicae nobis iam bene notam, cui nomen est "Gelatiamo," restantes petivimus. Diutius Latine sermocinari volentes apud Furnarium cenavimus tres: Alexandrus, Brennus, Stephanus.
15 die mensis Martii anni MMVIII:
Haec commoratio praecipua et perfestiva fuit quia apud Museum Artium Seattlense expositionem illam invisimus artificiorum Romanorum quae numquam antehac inlustre museum Francogallicum nomine "Louvre" relinquerunt.
Mature advenientes apud illud nobis iam sat bene notum thermopolium Tullianum congregati sunt quod valde prope Museum Artium Seattlense situm est. In numero nostro fuerunt multi "novi homines," scilicet qui numquam antea nobiscum commorati erant. Discipuli per sermonem Latinum inter se melius fusiusque cognoverunt, vocabula multa petiverunt et inter se et a praeceptoribus peritioribusque. Praeceptores, inter alia multa, de Oebergianis libellis necnon de Stephani enchiridii “Vita Nostra” titulo inscripti emolumentis, detrimentis, usu proprio disputaverunt. Postea quadam in popina Mexicana haud mala prandium sumentes de sua cuiusque patria necnon de terris aliis variisque sermones seruimus.
Post prandium exhibitionem Romanam intravimus, cuius magnitduine, pulchritudine, mirabilitate commoti, immo paene obruti sunt animi nostri; nam illic multa vidimus quae ex librorum imaginibus nobis nota, paucissimi autem Lutetiae Parisiorum suis oculis mirati erant. Ipsa artificia sermones plane incitaverunt de Romanorum antiquorum vita, rebus gestis, artibus, sacris, cet.
Quadam in glaciei edulis Italicae popina proxima, cui nomen lepidum est “Gelatiamo,” ut solemus, inter colloquia varia amoenaque nos refocillantes huius Commorationis Seattlensis finem fecimus.
22 die mensis Novembris anni MMVIII:
Haec Commoratio Seattlensis omnium adhuc habitarum frequentissima fuit, nam septendecim fuimus. Videlicet permultos alumnos Bellingamenses attluit Eduardus Engelsing professor, amicus noster doctus Latineque disertus. Vndecima hora matutina in illo thermopolio Starbuckiano congregati sumus quod in Centri Seattlensis Aedibus Mediis prope ostium meridianum situm est. Paulo post, duodecima fere hora, e pluribus ex Aedium Mediarum popinis, quarum sunt multae, prandium extulimus unaque in maximo atrio prandimus. Post prandium expositionem anthropologicam illam nunc primum ex Aethopia emissam invisimus cui est titulus "Lucia Legatum: Thesauri Abditi," in qua expositione non solum ipsius Luciae ossa famosa aliaque hominidarum ossa sed etiam multa de historia et cultu humano Aethiopico visa Latine descripsimus. Postea ad Summam Ollam thermopolium transiimus ubi non solum de expositione sed etiam de compluribus aliis, velut bestiis variis horumque nominibus Latinis, una lusorie sermocinati sumus. Plerique apud popinam Asiaticam nobis pridem notam quae vocatur Ascalonia cenavimus.
21 die mensis Februarii anni MMIX:
Hoc die in regione universitaria Seattlensi conversati sumus quinque Latine loquentes, undecima hora in illud thermopolium convenientes quod intra Vniversitatis Vasintoniensis bibliopolium positum est. Duodecima hora in popinam Graecam "Continentalem" transiimus, ubi quondam iam una pranderamus. Post prandium Graecum festive Latineque habitum in Museum Burke, museum anthropologicum, iimus in quo permulta ac pervaria exponuntur de quibus disputavimus: inter quae et expositio caffearia et bestiarum exstinctarum sceleta necnon et opificia artificiaque humana maxima ex parte indigena et boreoccidentalia. Post museum inspectum nos in ipsius musei thermopolio refocillavimus, immo in musei horto. Postea deambulantes ac pulcherrimum universitatis campum aliquantisper mirati in Viam Vniversitariam reversi sumus ubi sat longum tempus quadam in taberna nomine Gargollae (“Gargoyles”) degimus ubi veneunt non solum gargollae sed etiam omnis generis ornatus domesticus cuius argumenta sunt vel gargollae, dracones, sancti, icones religiosae, daemones diabolique, necnon et di faërici, pumiliones, nanni, “trolli” et ita porro. In popina vocata “Pho Vietnam 2” cibos Vietnamienses cenavimus.
4 die mensis Aprilis anni MMIX:
Hoc die Museum Volatus Seattlense, totius orbis terrarum maximum privatum museum aeronauticum invisimus. Immo hoc museum tam ingens est ut duabus fere horis tantum unum aedificii membrum inspicere vacavimus. Cetera forsan aliquando videre poterimus. Non solum in maximo aedificio sed etiam foris praebentur visu aeronavigia innumera, quorum nos solummodo ea quae in ambobus bellis mundanis usurpata sunt scrutati sumus. Non solum de aeronavium partibus volatusque principiis sed etiam de de cultu civili, militum vita, belli pavoribus, heroum animo invicto permulta didicimus Latineque tractavimus. Postea ad Forum Praecursorum transiimus, apud Bibliopolium Sinus Elliott nos refocillavimus, deambulavimus, in Collyrina Mitchelli cenavimus.
16 die mensis Maii anni MMIX:
Hoc iucundissimo die Bellingamiae congregati sumus, ubi grex Seattlensis multos novos homines, scilicet Vniversitatis Vasintoniae Occidentalis discipulos, cognovit. Eduardus Engelsing, eiusdem academiae professor, commorationem in complures res faciendas visendas explorandas disposuit. Primum nundinas quasdam otiose inspeximus; deinde e media urbe in universitatem ambulavimus ubi plerique omnia notatu digna signa statuasque, quorum sunt multa, Latine loquentes inspeximus et descripsimus. Postea omnes quibusdam in hortis publicis amoenis ientaculum a Bellingamiensibus comiter praebitum sumpsimus dum de pervariis (disciplina Latina, modis discendi, vita academica, amicis, cibis et ita porro) colloquimur. Vtinam tam multos Bellingamienses Latine loquentes mox revideamus!
14 die mensis Novembris anni MMIX:
Hunc diem in urbis regione antiqua degimus pinacothecas explorantes in quibus paene omnia opera exposita aut moderna erant aut modernissima (sive ad artium genus "avant garde" attinentia). Erant quibus multa placuerint et quibus paucissima; sed etiam quae non placent describi possunt....nonnumquam etiam alacrius quam placentia. Descripsimus utcumque artificiorum colores formas materias argumenta necnon et ipsorum artificum consilia. Maximam admirationem movit signum quoddam cuius forma erat tormenti moderni, sc. eius generis quod globos ferreos emittit. Ex hoc autem -- symbolus haud tectus! -- proiciebantur, immo, explodebantur simul permulta instrumenta et vehicula bellica velut naves et aeroplana militaria. Italice postea cenavimus.